احنا السهرانين على ..
مصالحكو
وكل همنا ..
نريحكو
ولفوق .. لفوق ..
نطلعكو
مالكم مش حاسين بتعبنا ..
عشانكو
ضحينا براحتنا لاجل ..
نسعدكو
سيبناكم تاخدو الرشوة
قلنا اهو دخل اضافى ..
ينفعكو
سيبناكم تصرخو وتعارضو
قلنا اهو تنفيس و محدش ..
هايسمعكو
انما توصل لدرجة الرياسة
وتمشو ورا العيال الى تلفو ..
املكو
بتوع ابريل ولا مايو
ولا شهور تانية مش ..
ها تنفعكو
خليكو غلابة احسن
واجرو ورا رزق ..
عيالكو
دستور ايه الى ها تغيروه
هو الدستور دا ..
بتاعكو
الدستور دا احنا الى عملناه
ملك خاص مش ..
تبعكوا
وقال ايه عايزين ديموقراطية
ومجلس شعب حقيقى ..
يمثلكو
واحنا رحنا فين
ما حنا عارفين كل ..
طلباتكو
وعارفين كمان ..
اختيارتكو
ليه انتخابات
ووجع دماغ ..
يتعبكو
احنا بنجيب الاصلح
الى يقدر ..
يخدمكو
يبنى له كام مصنع
بفلوس بنك
وعلى ارض دولة ..
ايه يعنى
ماهو كله عشان ..
يشغلكو
يكسب له كام مليار ..
ايه يعنى
ما نتو بتاخدو ..
مرتباتكو
عملنا قانون طوارئ
يحافظ عليكو ويحمى ..
ولادكو
قلتو بالطوارئ بنتهان
وظباط وعساكر
بيدوسو على كرمتنا ..
ايه يعنى
ما هم برضو ..
اخواتكو
حيو حكومتكو ..
وارضو بيها
وادعو ربنا ..
يحفظهالكو !!!
ليست هناك تعليقات:
إرسال تعليق